Umsagnir

Bakki í Víðidal

Örn Óli Andrésson og Dagný Sigurlaug Ragnarsdóttir, Bakka í Víðadal

Viðtal við Örn í október 2018

Í tilefni þess að eitt ár er liðið síðan að fyrsti Fullwood M2erlin mjaltaþjónninn var tekinn í notkun á Íslandi fannst okkur alveg tilvalið að heyra í eigendum hans, honum Erni Óla Andréssyni og Dagnýju Sigurlaugu Ragnarsdóttur á Bakka í Víðidal og sjá hvernig mjaltaþjónninn hefði reynst þeim.

Við heyrðum í Erni Óla snemma morguns þegar að hann var í fjósverkunum.

Hvernig hefur fyrsta mjaltaþjónsárið gengið?

Það hefur gengið mjög vel og ef eitthvað er þá hefur það farið framúr væntingum.

Hefur mjaltaþjónninn stoppað oft á árinu vegna alvarlegra bilana?

Nei, aldrei.

Hvernig er ykkar reynsla af þjónustunni?

Þjónustan hefur verið góð og við erum mjög ánægð með þjónustumennina sem geta alltaf svarað og gefið ráð ef það er eitthvað sem við þörfnumst. Við höfum nú líka ekki mikið þurft á henni að halda þar sem að engar alvarlegar bilanir hafa komið upp.

Stendur Merlin undir væntingum?

Já hann stendur sannarlega undir væntingum. Ég féll fyrir honum um leið og ég sá hann fyrst í Hollandi, þar sem ég sá alla kosti hans sem pössuðu vel fyrir íslensku kýrnar. Stærsti kosturinn er að geta sett handvirkt á, t.d. þegar kvígur og nýbornar kýr eru að koma fyrst inn þá er mjög gott að geta sett á þær handvirkt til þess að halda þeim rólegum, þá setjum við á þær í fyrstu tvö skiptin og eftir það verðum við ekki var við nein vandamál. Flokkunarhliðin eru einnig stór kostur, við vorum t.d. með slasaða kýr og það var mjög auðvelt að taka hana frá með hjálp hliðanna, svo gott að geta stýrt þessu vel. Einnig er hann ótrúlega fljótur að setja á og armurinn kemst líka mjög neðarlega. Hann horfir ekki bara á laser-inn þegar hann er að byrja heldur notar hann minnið líka sem hjálpar til.

Hafa fitusýrurnar farið upp síðan að þið skiptuð yfir í mjaltaþjón?

Nei, þær eru á svipuðum stað, meðaltalið er 0,31. Mjólkurgæðin eru ótrúlega góð og mjólkin er alltaf jafngóð þó svo að hún hafi staðið í ísskáp í fjóra daga.

Hefur líftala verið í lagi?

Meðaltal líftölu hefur verið í kringum 15.

Ertu að nýta þér efnagreininguna í M2erlin forritinu?

Já, við erum að nýta hana og hún virðist passa nokkuð vel. Þetta er feiknagott hjálpartæki og prentar út fyrir okkur upplýsingar ef eitthvað kemur upp á. Okkur hefur gengið mjög vel að komast í gegnum þetta kerfi.

Og eruð þið að sjá þegar það kemur súrdoði, eruð þið að horfa á fitu- og próteinhlutföllin minnka?

Já, við sjáum það.

Er eitthvað fleira sem þið eruð að nýta ykkur í M2erlin forritinu?

Við erum aðeins byrjuð í sambandi við lyfin og skráum inn allar dagsetningar sem er mjög gott, sérstaklega þegar að dýralæknirinn kemur þá bara kíkir hann í tölvuna.

Er eitthvað sem að þið munduð gera öðruvísi núna ef þið væruð að taka í notkun mjaltaþjón heldur en þið gerðuð fyrir ári síðan?

Nei, ég held bara ekki, þetta var mjög góður tími.

Finnst ykkur mikill munur vera á því að vera kúabóndi í mjaltabás eða með mjaltaþjón?

Já! Það er svo sannarlega mjög mikill munur, okkur finnst mun skemmtilegra að vera með mjaltaþjóninn, maður sér líka bara hvað kýrnar eru miklu afslappaðri og rólegri. Þeim líður betur og mun meiri ró komst á í fjósinu stuttu eftir að mjaltaþjónninn kom. Einnig tókum við eftir því að á morgnana var alltaf mjólkurslóð um allt fjósið, vegna lengdar á milli mjalta sem var alltaf í kringum 12 tímana en í dag sést hún varla. Undanfarin ár höfum við alltaf haft vinnumann til aðstoðar en núna í sumar þurftum við ekki aðstoðina þar sem við erum mun frjálsari vegna mjaltaþjónsins.

Við viljum þakka Erni fyrir að gefa sér tíma í að svara þessum spurningum fyrir okkur og óskum honum og Dagnýju til hamingju með 1 árs afmæli „fjósamannsins“.

Meira
Steindyr

Nýr Fullwood Merlin mjaltaþjónn á Steindyrum í Svarfaðardal

Þau Gunnhildur Gylfadóttir og Hjálmar Herbertsson bændur í Svarfaðardal festu kaup á Fullwood Merlin mjaltaþjóni sem þau komu fyrir ásamt mönnum úr þjónustudeild Landstólpa.

Viðtal við hjónin í mars 2020 þar sem að við heyrðum hljóðið og forvitnuðumst um hvernig uppsetningarferlið og gangsetningin hefði gengið.

Elvar uppsetningarmaður hafði hug á að setja 2-3 kýr í gegnum mjaltaþjóninn á miðvikudegi. Í kvöldmjaltatímanum var svo allt tilbúið fyrir það og fyrsta kýrin var rekin inn. Synir okkar tveir, Jón Bjarki og Herbert voru hér ásamt Frey Brynjarssyni og sáu um að hjálpa Elvari og læra af honum. Allt gekk samkvæmt áætlun og þeir vildu aðra. Þetta endaði svo með því að það voru 19 kýr settar í gegn í þessari prufu og máttum við Hjálmar hafa okkur öll við að fá að mjólka einhverjar með gamla laginu. Strákarnir fóru hamförum og fannst þetta mjög skemmtilegt. Á fimmtudagsmorgni var svo formlega sett í gang og allt hefur haldið áfram að ganga vel síðan. Erum meira að segja búin að prufa að verða rafmagnslaus í tvo tíma svo Elvar hefur fengið að prufukeyra allt með okkur.

Kýrnar hafa verið kjánalega rólegar og allt gengið áreynslulaust

Við vissum að við ættum einhverjar kýr sem ekki væri hægt að mjólka í mjaltaþjóni en hann er samt ótrúlega fær. Hann mjólkar t.d eina sem er með stóra millispena báðu megin. Héldum að hún yrði sú fyrsta sem færi á sláturhúsið. Viðmótið á skjánum er mjög gott og auðvelt fyrir alla að læra á það.

Uppsetningin á mjaltaþjóninum gekk vel. Veðurguðirnir hafa svosem ekkert verið að hjálpa til og hefur það tafið ýmislegt. Uppsetningarteymið þeir Elvar, Illugi og Laslo hafa verið frábærir og tekið öllu með stóískri ró og brosi á vör. Þessir öðlingar eiga allan heiður skilið fyrir hjálpina. Sem betur fer gistu þeir hjá okkur á milli helga því annars væri ekkert farið í gang vegna ófærðar. Það var erfitt að trúa því þegar þeir mættu með endalaust marga kassa fulla af dóti að þetta ætti eftir að verða að einhverju gáfulegu!

Ennþá eru 4 kýr sem þarf að setja handvirkt á og koma til með að tína tölunni í framtíðinni. Svo eru nokkrar sem þarf að ýta aðeins við en við erum alveg róleg ennþá með það.

Framhaldið leggst vel í okkur. Við eigum ennþá eftir að breyta gamla fjósinu fyrir geldkýr og burðarstíur. Vonir stóðu til að þetta yrði búið fyrir vorið en tíminn sem hefur farið í snjómokstur og á eftir að fara í snjómokstur seinkar því sennilega. Þegar allt verður klárt verður þetta frábært. Auðveldari vinna og við treystum því að Merlin sé miklu betri mjaltamaður en við!

Við þökkum þeim Gunnhildi og Hjálmari fyrir að gefa sér tíma í að svala forvitni okkar og óskum þeim áframhaldandi góðs gengis með nýja „mjaltamanninn“

Meira
Tannstaðabakki

Guðrún Eik Skúladóttir og Óskar Már Jónsson, Tannstaðabakka

Einungis sex mánuðir liðu frá fyrstu steypu þar til við byrjuðum að mjólka. Verkið var afar vel undirbúið og skipulagt og gangur framkvæmda lyginni líkastur.

Þar skipti miklu máli að við keyptum allan „pakkann“ af Landstólpa: hús, innréttingar, steinbita, mjaltaþjón, annan tæknibúnað og tilheyrandi vinnu við byggingu og uppsetningu.

Við vorum fljót að læra grunnatriði tækjanna til að byrja að mjólka. Smám saman tileinkum við okkur svo alla þá spennandi möguleika sem kerfið býður upp á. Landstólpamenn eru mjög liðlegir að kenna, aðstoða og leiðbeina.

Breytingin er mikil og sérstaklega finna kýrnar fyrir því. Þeim líður greinilega afskaplega vel í nýja fjósinu og eiginlega öfundum við þær af notalegu og áhyggjulausu lífi sínu!

Við viljum þakka Guðrúnu Eik og Óskari Má fyrir að gefa sér tíma í að gefa þessa umsögn og óskum þeim alls hins besta í búskapnum.

Meira